O 8 de marzo é o Día da muller. Nesta data lembramos todos os logros acadados polas mulleres, buscando a igualdade de dereitos, oportunidades e liberdades.

A muller representa enerxía, valor, determinación e creatividade. Xuntos debemos construír unha sociedade xusta e igualitaria.

Este Genially que vos presentamos quere dar a coñecer grandes mulleres de todos os tempos, que tamén foron inventoras, pintoras, escritoras, científicas, pacifistas, deportistas…todas foron grandes mulleres e merecen ser coñecidas.

Podedes saber máis sobre elas na exposición de mulleres científicas e inventoras que hai na biblioteca.

---

O minimundo deste mes preséntanos un coñecido conto ” A ratiña presumida” pero agora cunha nova versión. Escoita este audio para lembrar a historia e tamén para ver se es capaz de recoñecer ás persoas que dan voz aos diferentes personaxes do conto. Ven a biblioteca e fai ti unha nova versión desta historia.

---

Nestas curtas e libros que vos propoñemos, atoparedes a unhas protagonistas: fortes, valentes, libres e seguras de si mesmas.

---

FELIZ DÍA DA MULLER

Saúdos dende a biblioteca virtual.

O Entroido deste ano trouxo á escena aos auténticos protagonistas da festa. Os felos de Maceda, os cigarróns de Verín, as pantallas de Xinzo, o boteiro de Viana do Bolo e as bonitas de Sande foron as estrelas convidadas que captaron toda a atención do noso público.

O seu espectáculo cheo de cor e son ofreceu unha posta en escena digna dun verdadeiro Oscar. Grazas a todos pola visita e polas boas explicacións ofrecidas, foi un auténtico luxo tervos na nosa escola.

---

Os outros grandes protagonistas da festa foron o alumnado e a comunidade educativa que acudiron vestidos con disfraces baseados en películas como: “O rei león” “Grease” “Piratas do Caribe” e outros personaxes do mundo do espectáculo.

---

VIVA O ENTROIDO!

Saúdos dende o blog da biblioteca.

O 24 de febreiro, foi un día que dedicamos a Rosalía. Lembramos a súa vida, debuxamos e pintamos o seu retrato, e tamén escoitamos e recitamos algúns dos seus poemas.

O club de lectura “Os Coutolines” quixo honrar a esta gran escritora galega recitando algúns dos seus poemas que comparten con todos nós. Moitas grazas polo voso traballo e pola vosa implicación, o resultado foi marabilloso!

Poema “Adiós ríos, adiós fontes...”recitado por Emma, Uxía, Jade, Candela, Clara, Lara e Yodenny. Club de lectura de 5º

Poema “Negra sombra” recitado por Álvaro, Mateo, Álex e Essien. Club de lectura de 5º

Poema “Campanas de Bastabales” recitado por Guido, Yodenny, Julia, Mikaela. Club de lectura de 5º

Poema “Lugar máis fermoso…” recitado por Tomé, Antón e Carla. Coutolines de 5º

---

Na escola seguimos coñecendo cada día máis a Rosalía de Castro e a súa obra. Nesta ocasión, o alumnado de 2ºA traballou un poema que fala de tres pitas brancas e un galo negro. Paga a pena escoitalos e gozar do gran traballo realizado.

Neste vídeo podedes escoitar o mesmo poema de Rosalía, musicado por Amancio Prada.

---

Aquí vos deixamos algúns dos traballiños que fixemos neste día dedicado a Rosalía.

ROSALIA SEMPRE NA NOSA MEMORIA….INESQUECIBLE ROSALÍA!

Rosalía de Castro, muller importante para o galego, para as galegas e galegos. Adiantada a súa época, soubo transmitir forza, amor, tenrura e dor dende a palabra. Deixounos un legado poético que debemos coñecer e valorar.

Hoxe 23 de febreiro de 2025, conmemórase o 188 aniversario do nacemento de Rosalía de Castro (23 febreiro de 1837- 15 xullo de 1885) e queremos celebralo lembrando a súa vida, recitando e escoitando os seus poemas.

---

OS BOLECHAS lembran a Rosalía de Castro.

---

MÚSICA: Os lunnis de lenda cántanlle unha canción a Rosalía.

---

CASA: Padrón foi a localidade onde Rosalía viviu os últimos anos da súa vida, na casa da Matanza. Hoxe en día é un museo dedicado a ela. Se queres facer un percorrido pola súa casa, mira este vídeo e escoita o poema de “Adiós Ríos, Adiós Fontes” .

---

POEMAS DE ROSALÍA. Os xogadores do Celta recitan un poema de Rosalía.

---

CURIOSIDADES: Mira e escoita estas cinco cousas que seguro non sabías de Rosalía de Castro.

---

ROSALÍA EN OURENSE: Rosalía está moi presente na cidade de Ourense e no mundo enteiro. Na nosa cidade hai unha rúa que se chama Rosalía de Castro, tamén hai unha biblioteca que leva o seu nome e por suposto unha ESTRELA.

---

ROSALIA SEMPRE NA NOSA MEMORIA….INESQUECIBLE ROSALÍA!!

O pasado 13 de febreiro foi o Día Internacional da Radio.

A radio é un importante medio de comunicación onde a voz é imprescindible. O novo espazo da biblioteca ten un lugar preferente para a radio, dende aquí as vosas gravacións poden chegar a  toda a comunidade educativa. Entrevistas, recitados de poemas, contos, saúdos, dedicacións especiais…todo o facemos dende a radio e cada vez mellor.

Por todo isto, decidimos convidar ao noso colexio a Vidal López. El é un gran comunicador, leva tempo facendo radio, vive no barrio do Couto e a súa voz é inconfundible. A charla foi moi amena, tivemos oportunidade de escoitalo, de facerlle preguntas, de ser reporteiros e de aprender moitas cousas. Grazas Vidal por contaxiar a túa paixón pola radio!

Este foi o saúdo que nos dedicou dende cadena 100!!!

---

Esta é a entrevista que lle fixemos a Vidal. Foi un pracer poder escoitalo e desfrutar da súa compaña no novo espazo da radio escolar. Grazas Emma e Antón pola vosa entrevista….xenial!!

Estas son entrevistas que fixemos neste día dedicado á radio. Nunha entrevistamos as mestras do colexio sobre o mundo da radio e os tipos de programas que máis lles gustan …escoitádeas!!

Nesta outra entrevista preguntamos aos compañeiros e compañeiras sobre a exposición de científicas e inventoras que neste mes hai na biblioteca…escoitádeos tamén!!

---

Grazas a todas e todos pola vosa colaboración e excelente traballo!!

Saúdos dende o blog da biblioteca!!!

O 11 de febreiro conmemórase o Día Internacional da Muller e a Nena na Ciencia. Este é un día para dar visibilidade ao traballo das mulleres que se dedican á ciencia, tecnoloxía, enxeñaría e matemáticas. O seu traballo é un referente feminino para a sociedade.

A ciencia e a igualdade de xénero son importantes para construír unha sociedade de futuro, unha sociedade onde as mulleres teñan acceso pleno e equitativo á ciencia. E poidan ser o que elas queiran ser.

---

Estas son algunhas das mulleres científicas que traballaron e actualmente traballan no mundo da investigación. Podes saber delas na exposición que hai na biblioteca.

---

Foron moitas as nenas galegas que se covertiron en mulleres científicas. Estas son algunhas das nosas científicas galegas que queremos que coñezades.

---

Tamén hai mulleres inventoras, este ano queremos que coñezades a 5 delas: Melitta Bentz, Mary Anderson, Letitia Geer, Bette Nesmith e Ángela Ruíz Robles.

Achégate á biblioteca e poderás descubrir o que inventou cada unha delas e levar tamén un marcapáxinas.

---

Feliz Día da Ciencia!

Saúdos dende bibliocouto!

O pasado venres o equipo de convivencia fixo unha actuación con mimos polo día da Paz. Lembráronnos con xestos a importancia de facer do mundo unha sociedade mellor,  de loitar contra as inxustizas, de ser inclusivos, de non discriminar e de ser a voz daqueles que non a teñen.

A representación mostrou situacións cotiás onde as persoas poden convivir en perfecta harmonía superando as diferenzas.

Grazas profes por estes momentos tan especiais e por achegarnos ao mundo dos mimos!

Aquí vos deixamos un pouquiño desa actuación en vídeo.

---

Xa circulan as mochilas viaxeiras con libros relacionados co proxecto “Mamá, quero ser artista”. Cada mochila leva un caderno onde haberá que seleccionar rimas, adiviñas, chistes ou curiosidades segundo o curso. Coas vosas seleccións faremos programas de radio e algunhas actuacións.

En infantil haberá que decorar a lámina do protagonista do conto como máis vos guste,  utilizando o material que queirades. Ao final do curso os traballos formarán parte dunha exposición que amosará o grandes artistas que podedes ser.

Este é un anticipo dos grandes traballiños que estades a facer….grazas familias pola vosa colaboración e implicación!

---

As obras de teatro non poden faltar no proxecto deste ano e así o pasado xoves o alumnado de 1º e de 2º foi ver ao auditorio unha obra de teatro en inglés. Titulábase “Hansel and Gretel” e desfrutaron un montón. O que máis gustou foron as cancións que non dubidaron en cantar e bailar.

---

Este mes o concurso do “Teatro Misterioso” proponnos adiviñar vocabulario do teatro. Investiga e escribe a solución, non esquezas poñer os teus datos. Lembra que os acertantes sempre teñen premio.

---

A próxima semana estará dedicada ao “Día da muller e a nena na ciencia”

O pasado luns visitou o club lectura unha alumna do IES O Couto, chámase Anyely e escribe fermosos poemas de loita, inxustiza, amizade e amor.

Nesta semana dedicada á paz o seu poema “Tierra de sueños rotos” soa con forza e busca coas palabras, a rima e os versos a ansiada paz no mundo. A poesía que podedes escoitar neste audio está escrita por Anyely e músicada pola profe Olalla.

---

O proxecto deste ano está dedicado ao mundo da interpretación. Nesta ocasión, alumnas de 4º de primaria contan un conto no Kashibai titulado “O paxaro Puhuy”.  Esta historia conta o motivo polo que este paxaro ten unha pluma tan especial pero tamén fainos reflexionar sobre a importancia de ser xenerosos e non egoístas.

Grazas Alexandra, Ana, Vera e Ximena…sodes unhas grandes contadoras de contos.

---

Os obradoiros deste mes de xaneiro estiveron dedicados a facer actividades STEAM coa goma Eva e cos lapis 3D.

---

Cada 30 de xaneiro, coincidindo co día do nacemento de Castelao, celébrase o Día da Ilustración. Unha data que serve para reivindicar o papel dos profesionais do mundo da ilustración homenaxeando a un ilustrador ou ilustradora histórico galego. Este ano o protagonista é Xosé Vizoso, un dos artístas gráficos máis importantes e prolíficos da Galicia recente.

Nos últimos anos as figuras homenaxeadas foron:

2025: Xosé Vizoso

2024: Xesús “Chichi” Campos

2023: María Antonia Dans

2022: Reimundo Patiño

2021: Lolita Díaz Baliño

2020: Cándido Fernández Mazas

2019: Federico Ribas

2018: Camilo Díaz Baliño

2017: Álvaro Cebreiro

---

No club de lectura falamos de paz con poesía. Lemos uns KAIKUS: un tipo de poesía xaponesa formada por 3 versos de 5,7 e 5 sílabas respectivamente. Normalmente a temática dos kaikus é sobre a natureza, os que se recitaron no club foron sobre a paz. Tamén aproveitamos para facer entrega dos novos libros que imos ler no club de lectura.

---

Que poñades moita paz na vosa vida!!

O 30 de xaneiro celebraremos o Día da Paz, celebraremos que o mundo pode ir mellor se hai comprensión, respecto e tolerancia.

A paz non é algo que se desexa, é algo que se constrúe empregando: un sorriso, unha mirada, unhas verbas, unhas apertas… e diso todas e todos temos dabondo. Empecemos a construír a paz!!

---

O 30 de xaneiro conmemórase o aniversario da morte de Mahatma Gandhi. Líder pacifista que naceu na India o 2 de outubro de 1869 e foi asasinado o 30 de xaneiro de 1948 ós 78 anos.

Gandhi defendeu e promoveu a paz e a non violencia, súas son estas verbas: “Non hai camiño para a paz: a paz é o camiño”.

Foron moitos os que seguiron e imitaron esta forma de actuar, neste genially poderás coñecelos.

Se queres saber algo máis sobre eles só tes que coller un código QR no colexio, levalo para a casa e escanealo dende un teléfono móbil. Proba…é moi sinxelo!!!

---

Para o tempo lector propoñemos contos e curtas que tratan da amizade, igualdade, axuda, tolerancia, responsabilidade…Desexamos que vos gusten e vos fagan pensar!!!

---

Os libros non poden faltar nesta data, os que vos amosamos pódense ler e ver na biblioteca do colexio, tamén se poden levar á clase para ler no tempo lector. Se tes algunha dúbida ou precisas axuda, consulta coas bibliotecarias.

Que teñades moita paz cos vosos amigos, coas vosas familias… e na vosa vida!!

Saúdos dende bibliocouto.

As mochilas viaxeiras xa están circulando con libros e cadernos relacionados co proxecto “Mamá, quero ser artista”. En infantil traballaremos os contos de Olga de Dios, no primeiro ciclo as rimas, no segundo os chistes e no terceiro as curiosidades do mundo.

Vós teredes que seleccionar a rima, chiste ou curiosidade que máis vos gustou e anotala no caderno da mochila. Realizaremos programas de radio coas vosas seleccións e o final de curso unha mostra do traballo realizado. Ánimo que imos camiño de ser grandes artistas!

---

O pasado 21 de xaneiro foi o Día  Internacional das Apertas, por este motivo queremos que lembredes un graffiti feito por Keith Haring e titulado “O abrazo”. O alumnado de 3º, 4º, 5º e 6º do curso pasado tivo oportunidade de afondar na biografía e obras deste artista e activista neoiorquino. Todos fixeron o seu Keith Haring particular que hoxe decora parte dos corredores do colexio.

---

O concurso do teatro misterioso ten unha nova proposta, busca a información que se pide, escribe a resposta e participa. Sempre hai premio para quen acerte!

Estes compañeiros e compañeiras foron os acertantes de novembro e decembro. Que agudiños foron!!

---

Esta é unha parte dos libros que se mercaron  a partir das vosas suxestións. A maior parte xa está colocada nos andeis da biblioteca, agardamos que desfrutedes da lectura e nos esquezades seguir facendo suxestións de libros… escoitarémosvos!!

---

A próxima entrada estará dedicada ao Día da Paz.