ANIMACIÓN E CAPTACIÓN
O 29 de setembro constituíronse os dous clubs de lectura. O grupo de 6º explicou nas clases de 5º o funcionamento do club, fixeron animación e intercambiaron experiencias. Son os maiores e teñen experiencia.
CONSTITUCIÓN DOS GRUPOS
En outubro entregamos os libros que se van ler no 1º trimestre. Os Coutolines de 6º “O neno can” de Fina Casalderrey e os Coutolines de 5º “Plan de rescate” de Antía Yáñez.
COMEZAMOS O NOVO CURSO NOS CLUBS DE LECTURA!
Damos a benvida a esta nova tempada cun vídeo de Gonzalo Pinillos. A súa obra está intimamente relacionada co mundo da lectura e dos libros, é un excelente punto de partida para falar dos libros e da lectura. Que opinades…? Xa falaremos….
COUTOLINES 6º ” O NENO CAN”
ACTIVIDADE 1. Saber da autora Fina Casalderrey.
Xosefa Casalderrey Fraga máis coñecida como Fina Casalderrey é unha das escritoras máis recoñecidas, traducidas e premiadas no ámbito da literatura infantil e xuvenil galega. Deuse a coñecer co libro “Mutacións Xenéticas” e logo seguirían unha morea de obras entre algunhas delas “Os misterios dos fillos de Lúa” e “O estanque dos parrulos pobres” libro lido xa hai dos cursos.
Ingresou na Real Academia Galega o 22 de novembro do 2013 e ademais de ser escritora tamén foi mestra de educación secundaria, etnógrafa vocacional, conferenciante e xornalista.
O libro “O neno can” foi escrito tamén por Francisco Castro, director da editorial Galaxia e presidente da Asociación Galega do libro Infantil e Xuvenil. É un libro escrito a favor de UNICEF.
ACTIVIDADE 2. Sinopse do libro
“O neno can” é un libro de relatos nos que se quixeron tratar asuntos relacionados cos dereitos da infancia, ou máis ben, coa falta de dereitos básicos que unha gran parte dos nenos e nenas do mundo padecen hoxe en día.
Os relatos contan a historia deses cativos que teñen que sobrevivir remexendo nos colectores do lixo; nenas que son obrigadas a casar con homes adultos cando aínda xogan coas bonecas; a discriminación de quen é diferente… A pesar da crueza das realidades que conta, son historias cheas de vida que nos enganchan.
ACTIVIDADE 3. Faladoiro sobre o libro
O libro que estamos a ler trata sobre os dereitos dos nenos, que se celebran o 20 de novembro. Ata o de agora, avanzamos en tres dos cinco capítulos e as tertulias de debate que estamos a ter están a resultar moi produtivas.
COUTOLINES 5º ” PLAN DE RESCATE”
Actividade 1. Saber da autora ANTÍA YÁÑEZ
Antía Yáñez naceu en Burela en 1991. Aínda que é enxeñeira, nunca traballou nesta profesión, dedícase a ser mestra na súa academia de Cecebre (Cambe) e a escribir e publicar libros. Ten publicadas obras en diversos xéneros literarios polas que lle foron outorgados moitos premios.
Algúns dos libros de Antía Yáñez son: “O misterio de Portomarín”, “O misterio do torque de Burela”, “A Reconquista”, “Be Water”, “PLan de rescate”,”Senlleiras”,”Entre Donas”e “O clan das barbies”.
ACTIVIDADE 2. Sinopse de “PLAN DE RESCATE”.
“Plan de Rescate” é un libro de aventuras que nos conta a historia dun grupo de nenos que están traballando na aula de apoio da súa escola cando algo raro acontece. Oen un estrondo e a mestra de apoio vai comprobar que pasou e, desaparece misteriosamente xunto co resto de compañeiros do colexio. Fóra escoitan a policía. Que acontece?
Toda unha aventura na que hai xuramentos, sangue, escopetas, e ata un plan de rescate. Pero tamén unha pizca de amizade, compañeirismo, traballo en equipo e …. algo de amor!.
Este é o grupo dos coutolines de 5º, os libros e as quedadas.
COUTOLINES 5º Y 6º
ACTIVIDADE: FALADOIRO SOBRE O LIBRO
Co final do primeiro trimestre, rematamos as nosas primeiras lecturas do ano. Escoitar as vosas ideas e reflexións sobre os libros lidos foi unha experiencias gratificante e constructiva para todos.
Parabéns ao grupo de 6º por completar “O neno can” e ao grupo de 5º por rematar “Plan de rescate”. Agardamos que as lecturas fosen do voso agrado e que espertaran a vosa imaxinación e as ganas de seguir lendo.
Xa estamos traballando na selección dos libros para o segundo trimestre, esperamos que os novos títulos sexan igual de interesantes e enriquecedores.
2º TRIMESTRE
COUTOLINES 6º. “OS PIRATAS DA ILLA ESPERANZA” de X. H. Rivadulla Corcón
O segundo libro para o grupo de 6º foi escollido con moito coidado e pensamos que vos gustará pois: os protagonistas comparten a paixón pola lectura, o ambiente mariño encaixa co proxecto escolar deste ano, e ademais na historia as emocións e os valores éticos volven ocupar un lugar importante. Agardamos que vos guste e que disfrutedes do pracer da lectura.
ACTIVIDADE 1. Saber do autor X. H. Rivadulla Corcón.
X. H. Rivadulla Corcón (A Coruña, 1962) é poeta, narrador, dramaturgo e guionista de televisión. Traballa dirixindo e escribindo programas para a TVG, especializado na cultura mariñeira. Publicou a novela “Do mar e a noite” (2002); os poemarios “Taberna á deriva” (2002), “O adeus do vello mariñeiro” (Xerais 2007), “Camiño ao mar” (2010), “Os papeis do vagabundo” (2010) e “Tankas da vida salgada” (2019); e as pezas teatrais “¡Furga Garabela!” (2001) “Salitre” (2003) e “Pan” (2008). As obras de literatura infantil e xuvenil que ten publicadas son: “O bebé máxico” (2000), “O elefante dunha soa orella” (2004. Premio Frei Martín Sarmiento), “¿A que veñen as gaivotas a Compostela?” (2006), “O sorriso de Claudia” (2007. Premio Frei Martín Sarmiento), “A balada de Roi Nemiña” (2007), “Os piratas da illa da Esperanza” (Xerais, 2008. Premio Frei Martín Sarmiento), “Amar unha serea” (2011), “O noso amor será eterno” (Xerais, 2011), “Soños de mar” (Xerais, 2014) e “Cando soa a buguina” (2020).
Actividade 2. Sinopse do libro
A Illa do Tesouro é o libro máis especial para os cinco membros do Club de Lectura Pedra dos Corvos. Cando coñecen ao Vagabundo, un vello e nobre navegante, que se convertirá en un amigo máis da panda, vivirán unha arriscada aventura que os levará a embarcarse no Praia de Quenxe para procurar un tesouro na illa da Esperanza e a enfrontarse a un situación tan inesperada coma dolorosa. Unha emocionante novela de temática mariñeira de X.H. Rivadulla Corcón, ilustrada por Adrián Solleiro, sobre a lealtade e a amizade, que convida a unha engaiolante lectura.
COUTOLINES 6º: PRESENTAMOS O LIBRO E COÑECEMOS AO SEU AUTOR
COUTOLINES 6º: FALADOIROS SOBRE O LIBRO “OS PIRATAS DA ILLA ESPERANZA”
Na xuntanza destas últimas semanas estivemos falando dos capítulos que tiñamos acordado ler. Todos coincidimos en que o libro resultar ameno e doado. O autor emprega unha linguaxe directa e dinámica, ideal para manter un bo ritmo nunha aventura pirata.
Ademais da diversión, o libro aborda temas que gustan como: o traballo en equipo e a curiosidade. A enfermidade de Xan, un dos protagonistas, entristece e tennos nerviosos pero esperamos que a supere….teremos que ler mais capítulos para sabelo!
DÍA DE ROSALÍA
Con motivo do Día de Rosalía, na reunión do club de lectura, limos e recitamos algún dos seus fermosos poemas. Desta maneira, afondamos tanto na figura da autora como no xénero poético.
COUTOLINES 6º: FALADOIROS SOBRE O LIBRO “OS PIRATAS DA ILLA ESPERANZA”
Seguimos profundizando no libro. Na reunión de hoxe compartimos as nosas impresións sobre os capítulos que lemos e revisamos as pasaxes que máis nos chamaron a atención. Xa acordamos os capítulos que imos ler para a seguinte quedada do club. E tamén avisamos de que non se permiten spoilers!
COUTOLINES 6º: REMATAMOS O LIBRO “OS PIRATAS DA ILLA ESPERANZA”
A nosa segunda aventura literaria, co club de 6º, chegou ao seu fin e quixemos celebralo. Preparamos un xogo con ilustracións do libro que repasan os momentos máis importantes, un obradoiro de chapas coa portada do libro e, por suposto, algo doce para endulzar a nosa última conversa do trimestre.
Compartimos unhas imaxes desa reunión chea de libros, chapas e doces.
COUTOLINES 5º “ERIN E O LOBO” de Érika Esmorís
No noso colexio temos un cariño especial por esta escritora. As súas historias acompáñannos por diferentes etapas: mentres que en 1º leron “Analfabeta”, en 3º e 5º de primaria compartiron a lectura de “Patio de luces“, agora os alumnos de 3º de primaria están a disfrutar do seu novo libro “Esta é a miña historia e terás que crela“. É un privilexio poder ler os seus libros e posiblemente ter un encontro coa escritora nos próximos meses….esperemos que se cumpra o desexo!
Actividade 1. Saber da autora Érika Esmorís
Érica Esmorís (A Coruña, 1977) naceu unha calorosa tarde de xullo preto da praia. O sol, o mar e os libros foron, desde o principio, os seus compañeiros de viaxe. Amante dos animais, estudou veterinaria e, aínda que exerceu uns anos, deseguida cambiou o bisturí polo teclado do ordenador e unha profesión máis creativa. Traballou nalgunhas das produtoras audiovisuais máis importantes de Galicia, tanto no departamento de desenvolvemento e guión como no de dirección. Como narradora, foi recoñecida con importantes premios, como o Premio Merlín de Literatura Infantil con «Nena e o mar» (Xerais, 2015), que volve gañar en 2025 con «Erin e o lobo»; o Premio de Narrativa Infantil Ciudad de Málaga con «Patio de luces» (Xerais, 2020), ou o Premio Raíña Lupa de Literatura Infantil con «Esta é a miña historia e terás que crela» (Xerais, 2025). Outros títulos da súa autoría son «O poder de Amabel» (2012), traducida ao castelán, catalán e éuscaro, «Ulises e as cronoamigas» (2015), «Quen salva un can» (Xerais, 2019) ou o álbum ilustrado «Analfabeta» (Xerais, 2024), que asina xunto con Dani Padrón.
Actividade 2. Sinopse do libro
Erin vive no máis fondo do bosque, nunha cabana construída polos seus pais para afastarse da civilización. Nunca viu unha cidade nin un colexio nin outro neno. Un día, o pai regálalle un libro vello e, ao lelo en voz alta, esperta un feitizo: a súa voz de cóxegas sacode o bosque enteiro. Erin faise bosque e o bosque faise nena. As súas palabras chegan a todas as criaturas (o raposo, o reiseñor, o olmo, a flor silvestre) e tamén a Noite, o lobo de pelame azul e corazón escuro condenado a vivir nunha cova pola súa manda. Erin é luz. Noite é escuridade. Salvar unha nena. Redimir un monstro. Lembrar onde latexa, de verdade, o fogar. Ás veces, todo iso comeza cun «Había unha vez». O XL Premio Merlín é unha emocionante historia sobre a forza das palabras, a beleza dos vínculos invisibles e o desexo profundo de atopar un lugar no mundo.
COUTOLINES 5º: PRESENTAMOS O LIBRO E COÑECEMOS A SÚA AUTORA
COUTOLINES 5º: FALADOIROS SOBRE O LIBRO “ERIN E O LOBO”
Na reunión desta semana, falamos dos capítulos que acordamos ler. Compartimos as nosas reflexións e relemos as pasaxes que nos chamaron a atención por algún motivo. Ao final, decidimos que capítulos deberiamos ler para a próxima quedada.
DÍA DA POESÍA CO LIBRO “POEMAR O MAR” DE ANTONIO GARCÍA TEIJEIRO
Con motivo da celebración do Día da Poesía, levamos a cabo un recital de poemas baseados no libro Poemar o mar, de Antonio García Teijeiro. Esta obra, que está estreitamente vinculada ao noso proxecto escolar, ofrece unha coidada selección de versos de temática mariña que nos serviron como fío condutor.
Grazas a esta actividade, o alumnado tivo a oportunidade de: coñecer ao autor, explorar a súa obra e recitar os seus poemas.
COUTOLINES 5º: FALADOIROS SOBRE O LIBRO “ERIN E O LOBO”
Seguimos explorando o universo de “Erín e o lobo“. Na reunión de hoxe compartimos as nosas impresións sobre os capítulos que lemos e revisamos as pasaxes que máis nos chamaron a atención. Xa trazamos a folla de ruta para a próxima sesión cos novos capítulos que acordamos.
COUTOLINES 5º: REMATAMOS O LIBRO “ERIN E O LOBO”
Rematar un libro é importante e, no noso club de lectura, queremos que sexa inesquecible. Por iso, para celebrar a última lectura do segundo trimestre, preparamos unha sesión especial chea de sorpresas.
Comezamos cunha actividade de xogo para lembrar e repasar momentos importantes da historia e atar calquera cabo solto que pudera quedar sen resolver.
Despois diso, pasamos a un obradoiro de elaboración de chapas, onde cada un fixo a súa chapa coa portada do libro.
E como as mellores ideas adoitan xurdir ao compartir un petisco doce, disfrutamos dunhas galletas mentres compartimos as nosas reflexións finais.
3º TRIMESTRE
DÍA DO LIBRO: ENCONTRO CO AUTOR X. H. RIVADULLA CORCÓN
O pasado luns, 20 de abril, os clubs de lectura de 5º e 6º de Primaria tiveron un encontro co escritor X.H. Rivadulla Corcón, autor da obra “Os piratas da illa Esperanza”.
A actividade permitiulle aos rapaces e rapazas conversar directamente co autor, resolver dúbidas sobre a trama e facerlle preguntas sobre o proceso de creación do libro. Ademais, puideron escoitar os seus consellos e recomendacións lectoras como escritor profesional. Grazas, Xosé Henrique, por inspirarnos con novas lecturas!
DÍA DO LIBRO: ENCONTRO LITERARIO CON ÉRIKA ESMORÍS
O pasado 29 de abril, as rapazas e rapaces dos nosos clubs de lectura tivemos unha cita moi especial. Aínda que as circunstancias non permitiron que a escritora Érika Esmorís nos visitase en persoa no colexio como a ela lle tería gustado, a tecnoloxía permitiunos borrar as distancias.
A través dun vídeo, Érika compartiu segredos e curiosidades sobre a súa obra Erin e o lobo, o libro que estivemos a ler e analizar nas últimas sesións.
Durante o encontro, a autora:
- Explicounos o proceso de creación da historia.
- Falounos da valentía da protagonista, Erin
Foi unha oportunidade fantástica para descubrir que, aínda que sexa a través dunha pantalla, a paixón polos libros non entende de barreiras físicas. Grazas, Érika, por facernos viaxar coas túas palabras!
COUTOLINES 6º: “MITOS GRIEGOS”
Este trimestre mergullámonos no fascinante mundo de “Mitos griegos”. O libro recolle 18 relatos que repartimos entre todos os integrantes do club para que cada un poida comentalos e defender os seus propios argumentos.
Na sesión de hoxe profundizamos nos cinco primeiros mitos e a experiencia non puido ser mellor: cada alumno e alumna preparou a súa historia con esmero e explicouna con moita claridade.
Como broche de ouro a este entusiasmo, xurdiu a proposta de elaborar unha árbore xenealóxica dos deuses gregos para organizar visualmente todo o que estamos aprendendo.
bookletwork.com 