Categoría: Biblioteca

Esta semana, os obradoiros da biblioteca acolleron unha actividade que conecta a arte cos incendios que ocorreron o verán pasado. Coordinada por Jocabed, a iniciativa centrouse na creación dun mural colectivo a partir de cinzas. Foi realizado polo o alumnado de 3ºA e 3ºB.

O mural colocouse na porta de entrada, servindo como homenaxe e testemuño dos lumes deste verán.

Presentamos un novo programa de radio que continúa e amplía o noso proxecto anual dedicado ao mar. Nesta ocasión, zarpamos cara ás Rías Altas para seguir descubrindo e afondando nos segredos da costa galega.

Enma e Martín de 6ºB son as voces que nos guiarán neste novo viaxe polas costa galega.

Xa está en marcha o RETO NÚMERO 2 do concurso “Canto sabes do mar”.  Nesta ocasión está relacionado coas comidas do Nadal e tedes que saber que rías galegas son as mellores produtoras de marisco, peixe e mexillón.  

A solución está no programa de radio dedicado ás Rías Baixas e  realizado neste mes de decembro polo alumnado de 5ºA. Busca, investiga e escoita para dar coa resposta axeitada.

Os obradoiros do mes de decembro están dedicados a facer adornos de Nadal con cunchas e limpapipas. Xa fixeches o teu?

Os obradoiros no cole do Greco algúns fixéronse con auga e outros con area de praia. Alumnado de 1ºB. Ben feito!!

Espíritu de equipo en decembro: a mellor maneira de celebrar e avanzar.

Saúdos dende a biblioteca virtual!

Empezamos decembro con actividades, programas de radio e novos retos cos que aprenderás e desfrutarás.

No programa de radio deste mes exploraremos as Rías Baixas. Sira, Ángela, María e Mateo de 5ºA desvelarán curiosidades e novos datos da Ría de Muros, Arousa, Pontevedra e Vigo. Escoitade con atención porque a solución ao novo reto de decembro pode estar neste programa de radio.

Xa temos os gañadores do reto “Canto sabes do mar” de novembro. Parabéns aos campións!

6ºA: Guido, Candela, Leire, Álex, Uxía, Antón, Yodenny, Lara, Clara.6ºB: Tomé, Enma, María, Jade, Manuela. 5ºA: Ángela, Álex Cid, Michelle. 5ºB: Pablo.

Novembro foi un mes dedicado á ciencia e a nosa biblioteca escolar transformouse nun auténtico laboratorio de exploración.

Foi un pracer ver este espazo convertido nun lugar para: realizar experimentos, observar o micromundo a través dun microscopio, explorar imaxes en 3D e mergullarse na lectura de libros de ciencia.

A acollida de todas as actividades foi magnífica. Só podemos expresar a nosa gratitude polo voso alto nivel de participación.

No edificio do Greco, os máis pequenos tamén fan experimentos.

Grazas polo voso alto nivel de participación nas actividades propostas.

O 20 de novembro é o Día Mundial da Infancia.

É un día para lembrar que as nenas e os nenos son a parte máis vulnerable da sociedade, que son moitos os avances conseguidos pero que é preciso seguir traballando polo seu benestar e desenvolvemento.

Descubre os 10 dereitos fundamentais de nenos e nenas.

Cremos que a mellor forma de ensinar e educar é a través dos libros. Aquí vos deixamos algúns para tratar este importante tema dos dereitos da infancia. Todos eles están dispoñibles na biblioteca. Cal cres que che pode gustar?

O club de lectura de 6º está lendo o libro: “ O neno can “, escrito por Fina Casalderrey e Francisco Castro. Ambos autores donaron parte dos beneficios obtidos coa venta do libro a UNICEF.

“O neno can” é un libro de relatos nos que se quixeron tratar asuntos relacionados cos dereitos da infancia, ou máis ben, coa falta de dereitos básicos que unha gran parte dos nenos e nenas do mundo padecen hoxe en día.

Cada relato vai precedido dun artículo da Declaración Universal dos Dereitos do neno e, rematan cunha cita intelectual que lle da sentido a cada relato.

Este libro traballa algúns dos obxectivos da axenda do 2030 de desenvolvemento sustentable.

Seguimos cos obradoiros dedicados á CIENCIA: experimentos, libros, microscopios, imaxes en 3D….cal é o teu favorito?

O compromiso cos dereitos da infancia é diario. Sigamos traballando pola infancia hoxe e sempre.

Saúdos dende o blog de bibliocouto!!

O pasado luns festexamos o magosto no colexio con xogos, música, baile e moitas risas. Tamén houbo merenda de pan con chourizo e por suposto castañas asadas.

Propuxemos a actividade “A castaña mariñeira” para integrala no proxecto deste curso que ten o mar como principal protagonista. O resultado, como podedes ver neste vídeo feito cos vosos traballos, foi espectacular. Grazas a todos pola vosa colaboración e por ser tan creativos!

Fotos da exposición no edificio de Sas

Fotos da exposición no edificio do Greco

Grazas as familias e a todo o alumnado pola vosa implicación nesta actividade proposta!

Saúdos dende o blog de bibliocouto!

O venres 10 de novembro festexaremos no colexio o día de San Martiño, patrón da nosa cidade e día dedicado ó magosto. Non faltarán castañas asadas, risas, bailes e moitos xogos.

Falando de castañas…Canto sabes deste froito abundante nos soutos da Ribeira Sacra? Fai este cuestionario e comproba as túas respostas.

O magosto é unha festa de amizade e veciñanza na que se comen froitos de recente recolleita: castañas e uvas. Soe rematar con cantigas e danza e existe o costume de tisnarse unhas persoas a outras coa borralla da fogueira.

Este libriño conten refráns, adiviñas, trabalinguas, cantigas e unha receita para cociñar un delicioso biscoito de castañas que seguro vos animaredes a facer coa axuda da vosa familia.

E se prefires ler ou escoitar un conto o de “Xaíme e as landras” seguro che gustará. Que desfrutedes do magosto!!!

FELIZ SAN MARTIÑO!

Ola a todas e todos!

O xoves 30 de outubro celebramos o Samaín con diferentes actividades.

Na clase de inglés realizouse a actividade “Halloween under the sea” na que o alumnado elaborou terribles criaturas e monstros mariños coas que se decorou o colexio. Estas son as fotos…

A celebración tamén incluíu un espectáculo de luces con temática de Samaín e sesións de contacontos para desfrute de todo o alumnado.

Os disfraces terroríficos do alumnado e profesorado, así como a presencia de trasnos, xacias e meigas que o Equipo de Normalización Lingúística fixo para ese día completou unha mañá dedicada ao Samaín.

Ola a todos e benvidos de novo a bibliocouto!

Coincidindo coa celebración das bibliotecas escolares, 24 de outubro, un ano máis a nosa biblioteca reabre as súas portas a toda a comunidade educativa.

A biblioteca é un lugar perfecto para traballar coa información, reunirse, colaborar en traballos, facer construccións, obradoiros temáticos, radio e como non… ler e compartir a lectura de libros.

Presentamos o proxecto para este curso: “Na beira do mar”con el pretendemos dar a coñecer a xeografía, afondar na biodiversidade mariña, investigar as profesións e oficios do mar, explorar a representación do mar na literatura e nas tradicións culturais, descubrir festas populares e gastronomía típica das zonas costeiras e fomentar a concienciación sobre a sustentabilidade e protección dos océanos.

O obxectivo principal é concienciar á comunidade educativa sobre o valor do mar como fonte de vida, cultura, biodiversidade, e fomentar o coidado e a protección do océano.

Este é o vídeo co que iniciamos o novo proxecto. Sabedes quen canta a canción?

A radio é unha parte esencial da biblioteca e empregarase para apoiar e promover o proxecto con entrevistas, noticias, informacións… Este programa, realizado por alumnado de 6º, é o primeiro deste curso.

Este ano, a radio escolar lanza un novo programa chamado “Fiadeiros“, no que o primeiro venres de cada mes, a emisora ​​estará aberta a calquera persoa que queira gravar un podcast relacionado co proxecto. Familias, profesorado, alumnado… estades todos convidados!

Estas son algunhas das fotos da presentación do proxecto en Sas e Greco. Gústanvos?

A biblioteca xa está aberta , entra e descubre todo o que ten: novos libros, actividades renovadas, actuacións, encontros, xogos. AGARDÁMOSTE, NON FALTES!!!

Ola a todos e todasl!

Dende a biblioteca virtual, queremos desexarvos un verán fantástico, cheo de sol, xogos e moitas aventuras.

Este ano vivimos momentos moi especiais co noso proxecto teatral. Foi marabilloso ver como vos transformastes en artistas e o dábades todo, actuando, bailando, interpretando, narrando…A lectura e o teatro van da man; ambos nos invitan a soñar, a expresarnos e a conectar coas emocións.

Agora toca descansar, desconectar e desfrutar dunhas merecidas vacacións. Lembra que a maxia da lectura pode ir contigo de vacacións. Leva os teus libros favoritos contigo á praia, á montaña, á vila… ou simplemente a ese recuncho especial da túa casa!

Agardámosvos en setembro con moitas novidades e un novo proxecto!
Bo verán e felices lecturas!
Unha forte aperta de parte de todo o equipo da biblioteca.

CLUB DE LECTURA

Chegou o momento de dicir “Ata pronto” ou “Ata sempre”. Sodes e fostes un club de lectura marabilloso. Foi un pracer compartir con vós o tempo dedicado á lectura. Lembraremos con cariño as “quedadas” dos luns na biblioteca, cada historia que compartimos, cada personaxe que descubrimos e cada risa que botamos.
Agardamos que sigades explorando novos mundos a través dos libros, que a vosa curiosidade nunca se esvaeza e que sigades vivindo miles de aventuras dentro das páxinas dun libro.

Nunca deixedes de ler.

Unha forte aperta e feliz lectura!