Mes: Decembro 2021

O equipo de Bibliocouto desexa que pasedes un bo Nadal; compartindo momentos, festexando, descansado e pasando tempo en familia.

Esperamos que o espíritu destas festas chegue as vosas casas e sexades moi felices.

A piques de empezar as vacacións de Nadal, queremos lembrar algúns momentos que fixeron que decembro fose un mes moi especial.

Na biblioteca o obradoiro de pintar pedras, poido levarse a cabo coa vosa implicación, traballo e entusiasmo. Hoxe forman parte do decorado de Nadal do colexio.  Grazas!!

Tamén tivemos momentos para a poesía. Nun ambiente alegre, relaxado e da man de Sabela Gago, o alumnado de 4ºA e 4ºB demostrastes que sodes grandes intérpretes.

Só queda agradecer a vosa solidariedade, a colaboración e implicación na campaña de recollida de alimentos e xoguetes da Operación Quilo. Un ano máis fostes estupendos!!

Dende Bibliocouto propoñemos para cada un destes doce días que quedan antes do Nadal, un conto ou unha curtametraxe.

Desexamos que vos guste!

O pasado mes de novembro celebramos o mes da ciencia en galego nas bibliotecas escolares.

O folleto que publica Bibliotecas Escolares de Galicia, amosa unha imaxe e a difusión dun texto de Amparo Alonso  Betanzos, profesora, enxeñeira química e investigadora en intelixencia artificial.  

Mes da ciencia en Galego nas bibliotecas. Texto de Amparo Alonso Betanzos

Na biblioteca dedicamos o mes a facer obradoiros e tamén desfrutamos coa exposición de experimentos realizados polos  alumnos/ as da Aula Sirius do colexio.

A ciencia tamén foi o tema do traballo para o programa da radio e para o proxecto “Coñecendo a nosa cidade”. Nesta ocasión lembramos as rúas que teñen nomes de científicos coma: Doutor Fleming, Doutor Temes e a de Marie Curie.

Afondamos na Aula Newton que ofrece aprendizaxe en ciencia, tecnoloxía, enxeñería e matemáticas para estudantes de 14 a 16 anos e lembramos o certame de Galiciencia , a maior feira científica para estudantes de Primaria, de Secundaria e Bacharelato.